Ўзбекистон Республикаси Президентининг 2022 йил 21 январдаги “2022-2026 йилларда республиканиниг фармацевтика тармоғини ривожлантиришга оид қўшимча чора-тадбирлар тўғрисида”ги фармонига асосан Тошкент вилоятида умумий қиймати 179,68 млн долларни ташкил этган 12 та инвестиция лойиҳалари ҳаётга тадбиқ этилмоқда.

Хусусан, Зангиота туманида ташкил этилган “Ташкент Фарма-парк” инновацион илмий-ишлаб чиқариш фармацевтика кластери фаолиятини кенгайтиришга кўмаклашиш учун 80 Га ер майдони ажратиб берилган.

Ушбу кластерда вилоятга асосан четдан олиб келинадиган дори воситаларини маҳаллийлаштириш даражаси юқори бўлган лойиҳаларни жойлаштириш режалаштирилган.

Бундан ташқари, Паркент ва Бўстонлиқ туманларида фармацевтика соҳасига ихтисослашган “Паркент-фарм” ва “Бўстонлиқ-фарм” эркин иқтисодий зоналари ташкил этилган. Ушбу эркин иқтисодий зоналарда умумий қиймати 72,3 млн долларни ташкил этадиган 14 та инвестициявий лойиҳалар жойлаштирилган. Шундан 5 та лойиҳа фойдаланишга топширилган, 9 та лойиҳа амалга ошириш жараёнида.

“Паркент-фарм” эркин иқтисодий зонасида қиймати 26,8 млн. долларлик 7 та лойиҳа жойлаштирилган бўлиб, шундан 15 млн. долларлик 4 та лойиҳа ишга тушган. Қиймати 11,8 млн долларлик 3 та лойиҳа 2022 йилда амалга оширилиши режалаштирилган.

“Бўстонлиқ-фарм” эркин иқтисодий зонасида эса 45,5 млн. долларлик 7 та лойиҳа жойлаштирилган бўлиб, шундан 1,6 млн. долларлик 2 та лойиҳа ишга тушган. Қиймати 43,9 млн. долларлик 5 та лойиҳа 2022 йилда амалга оширилиши режалаштирилган.

Шунингдек, “Zuma-pharma” МЧЖ томонидан қиймати 8,5 млн долларлик йиллик 39,3 млн дона ампула кўринишидаги инъекцион дори воситаларни ишлаб чиқаришни ташкил этиш лойиҳаси 2021 йилнинг феврал ойида ишга туширилган. Натижада 265 та янги иш ўринлари яратилган.

“Renmin health care” МЧЖ томонидан қиймати 4,8 млн долларлик йиллик 25 млн қадоқда капсула кўринишида “Тайёр дори воситаларини ишлаб ишлаб чиқариш” лойиҳаси 2021 йилнинг якунида фойдаланишга топширилган. Ушбу лойиҳага кўра от қонидан заҳарга қарши зардоб ишлаб чиқарилмоқда.